بر یکنگ نیوز:

شہبازشریف لندن سے بیگم کلثوم نواز کی میت لے کر پی آئی اے کی پرواز 758 کے ذریعے لاہور پہنچ گئے

لؒاھور(انمول نیوز) سابق وزیر اعظم نواز شریف کی اہلیہ کلثوم نواز کی میت پی آئی اے کی پرواز کے ذریعے لندن سے لاہور پہنچادی گئی،شہباز شریف لندن کے ہیتھرو ایئرپورٹ سے پرواز پی کے 758 میں بیگم کلثوم نواز کی میت لے کرپاکستان پہنچے،جس نے صبح 6 بج کر 48 منٹ پر لاہور کے علامہ اقبال انٹرنیشنل ایئرپورٹ پر لینڈ کیا۔

کلثوم نواز کی میت کے ہمراہ شریف فیملی کے افراد آصف بیگ مرزا، خدیجہ مرزا، سائرہ صالح اور مسلم لیگ (ن) کے رہنما اعجازگل، صائمہ طارق اور نرگس بٹ پاکستان آئے ہیں ، تاہم نواز شریف کے بیٹے حسین اور حسن نواز پاکستان نہیں آئے۔

اس موقع پر لاہور ایئرپورٹ اور اطراف میں سیکورٹی کے خصوصی انتظامات کیے گئے تھےجبکہ پولیس نے تدفین کے لئے سیکورٹی پلان بھی تشکیل دے دیا ہے۔

کلثوم نواز کی نماز جنازہ شریف میڈیکل کمپلیکس رائیونڈ میں آج شام 5 بجے ادا کی جائے گی۔مولانا طارق جمیل نماز جنازہ پڑھائیں گے۔بیگم کلثوم کو نواز شریف کے والد میاں محمد شریف کے پہلو میں سپرد خاک کیا جائے گا۔

قبل ازیں لندن کی ریجنٹ پارک مسجد میں بیگم کلثوم کی نماز جنازہ ادا کی گئی۔ نماز جنازہ امام شیخ خلیفہ نے پڑھائی،جس میں سابق وزیراعلیٰ پنجاب شہباز شریف، کلثوم نواز کے صاحبزادے حسن و حسین نواز، سابق وزیر داخلہ چودھری نثار، سابق وزیر خزانہ اسحاق ڈار سمیت مسلم لیگ (ن) کے کارکنان اور مختلف شعبہ ہائے زندگی سے تعلق رکھنے والے افراد کی بڑی تعداد نے شرکت کی۔

مسلم لیگ ن کی ترجمان مریم اورنگزیب نے کہا ہے کہ بیگم کلثوم نواز کی رسم قل 16 ستمبر بروز اتوار عصر تا مغرب جاتی امراء میں ہوگی ، اس حوالے سے انتظامات مکمل کرلئے گئے ہیں۔

علاوہ ازیں سابق وزیراعظم نواز شریف نے شریف میڈیکل سٹی گراؤنڈ میں نماز جنازہ کے انتظامات کا جائزہ لیا جبکہ ان سے تعزیت کے لیے جاتی امرا آنے والوں میں مولانا فضل الرحمٰن سمیت سیاسی جماعتوں کے علاوہ مختلف شعبہ ہائے زندگی سے تعلق رکھنے والے افراد شامل ہیں۔

نواز شریف کی پنڈال آمد کے موقع پر کارکن ان کے گرد جمع ہوگئے، اس موقع پر احسن اقبال کارکنوں کو پیچھے ہٹنے کا بھی کہتے رہے مگرکارکنوں نے ایک نہ سنی، مولانا فضل الرحمٰن نے دعا کرائی جس کے بعد نواز شریف پنڈال سے واپس چلے گئے ۔

مریم نواز بھی تعزیت کے لیے آنے والی خواتین کے پنڈال میں کچھ دیر کے لیے آئیں، اس موقع پر ان کی صاحبزادی اور بیٹا جنید صفدر بھی وہیں موجود تھے،حمزہ شہباز بھی تعزیت کے لیے آنے والے پارٹی رہنماؤں اور کارکنوں سے ملتے رہے۔

جاتی امرا میں پولیس کی جانب سے سیکورٹی کے سخت انتظامات کیے گئے ہیں اور ٹریفک رواں دواں رکھنے کے لیے ٹریفک پولیس کی نفری بھی موجود ہے۔

تحریک انصاف نے سابق وزیراعظم نواز شریف کی اہلیہ بیگم کلثوم نواز کی نماز جنازہ میں شرکت کرنے کے لیے گورنر پنجاب چوہدری محمد سرور کی قیادت میں وفدکا اعلان کردیا ہے۔

ذرائع کے مطابق پی ٹی آئی وفدمیں صوبائی وزیر محمودالرشید، میاں اسلم اقبال سمیت دیگر وزراء شریک ہوں گے۔

سابق خاتون اول بیگم کلثوم نوازکے انتقال پر دنیا بھر سے تعزیت کا سلسلہ جاری ہے، ترک صدر طیب اردوان نے بیگم کلثوم نواز کے انتقال پر میاں نوازشریف سے گہرے دکھ اور تعزیت کا اظہار کیا ہے جبکہ پاکستان میں سعودی سفیر نے بھی جاتی امراء میں نواز شریف سے انکی اہلیہ کے انتقال پر تعزیت کی ۔

واضح رہے کہ کینسر کے موذی مرض میں مبتلا بیگم کلثوم نواز 11 ستمبر کو لندن میں انتقال کرگئی تھیں۔

Check Also

چین پاکستان کو معاشی بحران سے نمٹنے کے لیے مدد فراہم کرے گا:مشترکہ اعلامیہ جاری

بیجنگ : وزیراعظم عمران خان کے دورہ چین پرمشترکہ اعلامیہ جاری کردیا گیا، مشترکہ اعلامیہ …

error: Anmol TV
Anmol TV انمول ٹی وی

FREE
VIEW